М12 трассасы буйлап Татарстанда яңа туристлык зоналары барлыкка киләчәк

Татарстанда «Восток» М12 трассасы буйлап туристлык инфраструктурасын үстерү программасын эшләтеп җибәрергә планлаштыралар. Бу хакта республика Министрлар Кабинеты әзерләгән документта әйтелә, хәзер ул коррупциягә каршы экспертиза уза.

Инициатива кысаларында трасса буйлап кемпинглар, продукция сату өчен павильоннар, модульле санузеллар төзү, шулай ук актив ял итү зоналары булдыру каралган. Аерым игътибар аз хәрәкәтләнүче гражданнар өчен уңайлы шартлар тудыруга биреләчәк.

Проект туристларны урнаштыру һәм ял итү белән генә чикләнмәячәк. Документта навигация күрсәткечләре, маршрутның брендлы элементлары, капиталь булмаган визит-үзәкләр һәм төбәк сувенирларын сату нокталары урнаштыру да каралган.

Шул ук вакытта субсидияләр товар сатып алуга түгел, ә инфраструктура булдыру чыгымнарын компенсацияләүгә юнәлдереләчәк.

Туристлык объектлары составына туклану пунктлары, кемпинглар, палаткалар, автомобильләр өчен навеслар, прокат модульләре, санитария зоналары, кер юу һәм душ бүлмәләре, ана һәм бала бүлмәләре керәчәк. Моннан тыш, телемедицина нокталары, балалар һәм спорт мәйданчыклары, модульле мунчалар һәм ял зоналары булдыру планлаштырыла.

Программада инвалидлар өчен уңайлы мохит булдыру да каралган. Пандуслар, күтәргечләр урнаштыру, сукырлар һәм чукраклар өчен инфраструктураны җайлаштыру күздә тотыла.

Проектлар юл сервисының күпфункцияле зоналарында һәм трасса буендагы ял мәйданчыкларында урнаштырылачак. Аларны сайлап алу берничә критерий буенча башкарылачак: гамәлдәге объектлар, җир категориясе, проектларның нигезлелеге һәм туристлар агымына йогынтысы бәяләнәчәк.

Өстенлек инде эшләп килүче туристлык объектларына биреләчәк. Программа сәяхәтләр өчен уңайлы һәм имин шартлар тудыруга, юл буе сервисын үстерүгә һәм актив ял мөмкинлекләрен киңәйтүгә юнәлдерелгән.

Әлеге башлангыч «Туризм һәм кунакчыллык» илкүләм проекты максатларына туры килә.